Poytaxt radiosi FM107.2 / FM103.5 – aziz shahrimiz ovozi!

Ўзбекистон Республикаси Президентининг Ўзбекистон ва Малайзия ўртасида маданий ҳамкорликни янада ривожлантиришга қаратилган ташаббуси Малайзия Ислом санъати музейи раҳбарияти томонидан тўлиқ қўллаб-қувватланди. Марказ матбуот хизмати маълумотига кўра, Ўзбекистонда ушбу музейнинг ноёб экспонатларини намойиш этишга бағишланган махсус кўргазмалари ташкил этилади. Кўргазмада мамлакатимиз тарихи билан боғлиқ ноёб ислом маданияти асарлари намойиш этилади.  

Президент Шавкат Мирзиёевнинг расмий ташрифи ва музейга саёҳати

Маълумки, Ўзбекистон Республикаси Президенти Шавкат Мирзиёев 5 февраль куни расмий ташриф доирасида Куала-Лумпурдаги Малайзия Ислом санъати музейида бўлди. 

Ушбу музей Жануби-Шарқий Осиё марказида жойлашган ва ислом санъати меросини ўрганиш ҳамда асраб-авайлашга йўналтирилган. Музей 1998 йилда Малайзиянинг “Ал-Бухорий” жамғармаси кўмагида ташкил этилган бўлиб, унинг умумий майдони 300 минг квадрат метрни ташкил этади. Бу нафақат маҳаллий аҳоли, балки ислом мамлакатларидан келган кўплаб сайёҳларни ҳам ўзига жалб қилади.

Давлатимиз раҳбарига ушбу маданий муассасага асос солган шахслардан бири – музей директори Саид Муҳаммад Бухорий ҳамроҳлик қилди. Президентимиз учун махсус ташкил этилган музей бўйлаб экскурсия давомида, Саид Муҳаммад Бухорий ўзбек усталари музей биносидаги бешта ғаройиб гумбазнинг ички безакларини миллий услубда яратиш ва тиклаш ишларида фаол иштирок этганини алоҳида таъкидлади.

Ўзбекистон Президенти Малайзия Ислом санъати музейида сақланаётган ноёб артефактлар, хусусан, мамлакатимиз тарихи билан боғлиқ маданий мерос намуналари, қадимий қўлёзмалар, бетакрор миниатюралар ва тарихий ашёлар билан танишди.

Шунингдек, музейда Имом Бухорий, Имом Мотуридий, Имом Термизий номидаги халқаро илмий-тадқиқот марказлари ҳамда Ўзбекистон Ислом цивилизацияси маркази томонидан нашр этилган китоблар кўргазмаси ҳам ташкил этилди.

Ўзбекистон ва Малайзия ўртасидаги илмий ҳамкорлик янги босқичга чиқади.

Ташриф давомида Ўзбекистон Президенти музейнинг ноёб экспонатларини Ўзбекистондаги Ислом цивилизацияси марказида намойиш этиш бўйича таклиф билдирди. Бу таклиф Саид Муҳаммад Бухорий томонидан илиқ қарши олиниб, катта мамнуният билан қабул қилинди.

Шунингдек, музейга ташриф якунланганидан кейин Ўзбекистондаги Ислом цивилизацияси маркази директори Фирдавс Абдухоликов Малайзия Ислом санъати музейи директори Саид Муҳаммад Бухорий билан музокаралар ўтказди. Музокараларда Имом Бухорий, Имом Термизий ва Имом Мотуридий марказлари раҳбарлари ҳам иштирок этди.

Учрашув давомида Саид Муҳаммад Бухорий Президент Шавкат Мирзиёевнинг ташаббусини мамнуният билан қабул қилишини таъкидлаб, бу вазифани бажариш унинг ва музей жамоаси учун шараф эканини билдирди. Шунингдек, ушбу муҳим ташаббусни амалга ошириш учун икки томонлама етакчи мутахассисларни жалб этиш бўйича келишувга эришилди.

Шу билан бирга, Ўзбекистондаги Ислом цивилизацияси марказида экспонатларни жойлаштириш концепциясини аниқлаш бўйича фикр алмашилди. Шунингдек, малайзиялик ҳамкорларга Самарқанддаги Имом Бухорий мажмуасида амалга оширилган бунёдкорлик ишлари ҳақида маълумот берилди.

Малайзия Ислом санъати музейи директори мазкур музей кўргазмасининг иккинчи босқичини Имом Бухорий мажмуасида ташкил этиш таклифини ҳам қўллаб-қувватлади.

Илмий ҳамкорлик форуми ва стратегик келишувлар

Ўзбекистондаги Ислом цивилизацияси маркази матбуот хизмати маълумотига кўра, Ўзбекистон Республикаси Ташқи ишлар вазирлигининг ташкилий кўмагида, 4 февраль куни Малайзия Ислом санъати музейида “Маданий мерос: Ўзбекистон ва Малайзия ўртасидаги кўприк” мавзусида давра суҳбати ўтказилди.

Тадбир натижасида:
 - Ўзбекистон ва Малайзия олимлари жамиятини ташкил этиш тўғрисида келишувга эришилди;
 - Илмий ҳамкорлик тўғрисида қўшма Декларация имзоланди;
 - Малайзия Ислом тушунчаси ва цивилизацияси халқаро институти Ўзбекистондаги Ислом цивилизацияси марказига 100 000 дан ортиқ ноёб қўлёзма ва нашрларнинг электрон нусхаларига кириш ҳуқуқини тақдим этувчи сертификатни топширди.

Бу сертификат Ўзбекистон Республикаси Президентининг ислом цивилизацияси меросини асраб-авайлаш ва буюк алломалар асарларини чуқур ўрганишга қаратилган юксак эътибори учун билдирилган самимий ҳурмат ва эътироф белгиси сифатида баҳоланди.

Шу билан бирга, тадбир доирасида Ўзбекистоннинг Малайзиядаги элчихонасининг илмий ҳамкорликни ривожлантиришдаги муҳим ўрни ва унинг малайзиялик бир қатор нуфузли илмий-тадқиқот муассасалари билан ҳамкорликни мустаҳкамлашга қўшган ҳиссаси алоҳида таъкидланди.

Учрашув якунида Саид Муҳаммад Бухорий қуйидаги фикрларни билдирди:
“Ўзбекистон ҳақиқий цивилизация марказидир. Сизларда маданиятга оид кўплаб жиҳатлар борки, биз улардан ўрнак олишимиз мумкин. Ўзбекистон Президентининг Малайзияга ташрифи маданий алоқаларни мустаҳкамлашда муҳим аҳамият касб этади. Энг асосийси, муҳтарам Президентингиз тарихни чуқур билади ва маданиятни юксак қадрлайди. Ўзбекистонда маданий ҳаётда юз бераётган ўзгаришлар ва тараққиётдан шуни англаш мумкинки, давлат раҳбари маданият ҳаётнинг ажралмас қисми эканини яхши тушунади. Шу боис у маданиятни ривожлантиришга катта эътибор қаратмоқда. Мен Ўзбекистон раҳбарининг ташаббус ва фикрларига тўлиқ қўшиламан. Ўзбекистон бошқа мамлакатлар учун ҳам ўрнак бўлиши мумкин, чунки сизларда амалга оширилаётган ислоҳотлар юксак баҳога лойиқдир. Ўзбекистон билим ва маданиятни атрофдагилар билан баҳам кўрмоқда. Бу жараёнда Ўзбекистондаги Ислом цивилизацияси маркази катта роль ўйнамоқда. Биз марказ билан нафақат ҳозир, балки келажакда ҳам дўстона ҳамкорлик қилишга тайёрмиз. Ишонаманки, Малайзия Ислом санъати музейи ва Ўзбекистондаги Ислом цивилизацияси маркази ўртасидаги ҳамкорлик янада ривожланади.”

Ўзбекистондаги Ислом цивилизацияси маркази директори Фирдавс Абдухолиқов,  Президентнинг ушбу ташрифи тарихий аҳамиятга эга эканини таъкидлаб, қуйидагича изоҳ берди:
"Муҳтарам Президентимиз ташрифи ҳамда улар томонидан илгари сурилган ғоя ва таклифлар Ўзбекистондаги Ислом цивилизацияси маркази ва Малайзия Ислом санъати музейи ўртасидаги ҳамкорликни янги босқичга олиб чиқди. Давлатимиз раҳбари ўзаро ҳамкорлик, албатта, амалий натижалар бериши кераклигини алоҳида таъкидладилар. Шу боис олийжаноб Президентимизнинг таклифларига мувофиқ, музей кўргазмаси Ўзбекистонда ташкил этилади. Эндиликда бизнинг асосий вазифамиз – барча келишувларни икки томонлама ҳамкорликда амалга оширишдир"— деди Ўзбекистондаги Ислом цивилизацияси маркази директори Фирдавс Абдухолиқов.

O‘zbekistondagi Islom sivilizatsiyasi markazi direktori Firdavs Abduxoliqov boshchiligidagi delegatsiya Oksford Islom tadqiqotlari markaziga tashrif buyurdi.

Markaz vakillari va olimlari bilan uchrashuvda O‘zbekiston Respublikasining Buyuk Britaniya va Shimoliy Irlandiya Birlashgan Qirolligidagi  favqulodda va muxtor elchisi Ravshan Usmonov, O‘zbekiston xalqaro islom akademiyasi rektori Uyg‘un G‘afurov, Imom Buxoriy xalqaro ilmiy-tadqiqot markazi direktori Shovosil Ziyodov, Imom Termiziy xalqaro ilmiy-tadqiqot markazi direktori Muzaffarxon Joniyev, Imom Moturidiy xalqaro ilmiy-tadqiqot markazi direktori Jamoliddin Karimov va boshqalar ishtirok etdi.

Yangi O‘zbekistonda madaniy merosni asrab-avaylash, o‘rganish va ommalashtirish borasida amalga oshirilayotgan ishlar, dolzarb ilmiy tadqiqotlar haqidagi, shuningdek, bu boradagi xalqaro hamkorlikni faol rivojlantirishga oid taqdimotlar tinglandi.

O‘z navbatida Oksford Islom tadqiqotlari markazi vakillari ham qator davlatlar bilan hamkorlikda amalga oshirilayotgan “Islom olami tarixi atlasi” loyihasini taqdim etdi. Loyihada dunyoning har bir mintaqasining Islom sivilizatsiyasi rivojidagi o‘rni, muhim kashfiyotlar, olimlar hayoti va faoliyati, shuningdek, islom sivilizatsiyasining jahon ilm-faniga qo‘shgan hissasi ko‘rib chiqildi. Muzokaralar chog‘ida ushbu loyiha turkumida Markaziy Osiyoning islom sivilizatsiyasi rivojidagi roliga bag‘ishlangan jildni yaratish bo‘yicha ikki tomonning saʼy-harakatlarini birlashtirish bo‘yicha kelishuvga erishildi. Uchrashuv O‘zbekistondagi Islom sivilizatsiyasi markazi, Xalqaro tadqiqot markazlari va Oksforddagi islom tadqiqotlari markazi o‘rtasida hamkorlik memorandumlari imzolanishi bilan yakunlandi. Tadbir doirasida so‘nggi yillarda chop etilgan kitob va albomlar ko‘rgazmasi tashkil etildi.

Oksford islom tadqiqotlari markaziga Katta Langar Qurʼoni faksimilesi, shuningdek, “O‘zbekiston madaniy merosi dunyo to‘plamlarida” turkumidagi kitob-albomlar sovg‘a qilindi.

"O‘zbekiston boy tarix va betakror madaniy merosga ega qadimiy mamlakat, — dedi Oksford islom tadqiqotlari markazi direktori Farhan Nizomiy. — Men O‘zbekistonga ko‘p marotaba borganman. Ammo so‘nggi yillarda mamlakatingiz tashqi dunyo bilan aloqalari tobora kengaya boshladi. Yangi O‘zbekiston rahbari barcha xorijiy hamkorlar qatori biz olimlar, xorijiy tadqiqotchilar uchun ham eshiklar ochiq ekanini aytmoqda. Jumladan, O‘zbekistondagi Islom sivilizatsiyasi markazi tomonidan Oksford islom tadqiqotlari markazi bilan birgalikda o‘zaro manfaatli hamkorlikni rivojlantirish bo‘yicha olib borilgan muzokaralar kutilgan natijalarni berishiga ishonaman".

Shundan so‘ng O‘zbekiston delegatsiyasi vakillari dunyoning eng qadimiy kutubxonalaridan biri bo‘lgan Oksforddagi Bodlean kutubxonasiga tashrif buyurishdi va u yerda O‘zbekistonga oid nodir qo‘lyozmalar bilan tanishishdi.

"O‘zbekiston buyuk allomalar, shoir va mutafakkirlar yurti, – deydi Bodlean kutubxonasi Sharq qo‘lyozmalari bo‘limi kuratori Nikolas Kontovas. — Jumladan, Hazrat Alisher Navoiyning ul zot hayotligi davrida ko‘chirilgan qo‘lyozmalari kutubxonamiz fondining nodir javohirlaridan sanaladi. Bunday bebaho asarlarni bemalol butun insoniyatning  xazinasi deyish mumkin".

Kutubxonada o‘zbekistonlik olimlar O‘zbekiston madaniy merosiga oid o‘ndan ortiq qo‘lyozmalar bilan tanishdilar. Ayniqsa, Alisher Navoiyning shaxsiy dastxati bo‘lgan “Xamsa” qo‘lyozmasi katta tassurot qoldirdi. Mirzo Ulug‘bekning "Ziji Ko‘ragoniy" asari ham o‘ziga xos tarixga ega. Uni salkam uch asr ilgari oksfordlik olim Jon Geyvs sotib olgan va kitob hoshiyasida zarhal qaydlar kiritgan. Kitob sahifalarida usmonli turk tilidagi bitiklar ham uchraydi.

O‘zbekiston ilmiy delegatsiyasining Buyuk Britaniyaga tashrifi davom etmoqda.

O‘zbekistondagi Islom sivilizatsiyasi markazi, Respublika Maʼnaviyat va maʼrifat markazi, O‘zbekiston mahallalari uyushmasi hamda qator tashkilotlar bilan hamkorlikda «Tamaddun, madaniyat va maʼrifat» mavzusida «Maʼrifat karvoni» ilmiy-maʼrifiy va madaniy targ‘ibot tadbirlari respublika bo‘ylab boshlandi.

Respublika Maʼnaviyat va maʼrifat markazi rahbari boshchiligidagi ziyolilar jumladan, Mansur Bekmurodov, Muhammadjon Quronov, Anvar Matniyozov kabi qator yetuk olimlar guruhi Qoraqalpog‘istondagi targ‘ibot tadbirlarida ishtirok etmoqda.

«Maʼrifat karvoni» ilmiy-maʼrifiy va madaniy tadbirlarining o‘ziga xos jihati shundaki, hududlardagi olimlar, ziyolilar, sanʼat va madaniyat namoyondalari, maʼnaviy-maʼrifiy ishlarga masʼullar, mahalla faollari hamda ilg‘or yoshlarning bu boradagi bilim va ko‘nikmalarini oshirish, mamlakatimizning milliy-mafkura yo‘nalishidagi islohotlari, jamiyatni, ayniqsa yoshlarni buzg‘unchi g‘oyalardan himoya qilishda ziyolilarni faollikka undash, ular uchun muloqot platformasini yaratishdan iborat. Aynan ziyolilarni mazkur ishga keng jalb qilish orqali, xalqimiz orasida o‘zlikni anglash va tarixiy ildizimizga oid bilimlarni oshirish maqsad qilingan.