Канн кинофестивали доирасида Ўзбекистон миллий павильони иш бошлади

Францияда 77-Халқаро Канн кинофестивали бўлиб ўтмоқда. Кинофестивалда 100га яқин давлатдан иштирокчилар қатнашаётган бўлиб, унинг доирасида Ўзбекистон миллий павильони ҳам иш олиб бормоқда.

Маданият вазирлиги, Кинематография агентлиги, Миллий кинематографияни ривожлантириш маркази масъул вакилларидан иборат ўзбек делегацияси хорижлик кино мутахассислари ва ихлосмандларини янги миллий кино маҳсулотлари билан таништирмоқда.

Ўзбек павильонида "Фариданинг икки минг қўшиғи", "101-рейс", "Якшанба", "Пандемия", "Эврилиш", "Илҳақ" бадиий фильмлари ҳамда "Улуғ Амир ва донна Мария", "Баҳодир Ялангтўш" каби янги фильмларнинг айни кунларда Канн кинофестивали меҳмонлари учун тақдимоти ўтказилмоқда.

Шунингдек, делегация аъзолари томонидан халқаро майдонда Тошкент халқаро кинофестивали ҳақида батафсил маълумот берилиб, таклифлар қабул қилинмоқда.

— "Ўзбекистон Канн кинофестивалда қатнашмаган, сўнгги йиллардан қатнаша бошлади. Президентимиз томонидан кино соҳасида шу каби кўплаб муҳим ташаббуслар илгари сурилмоқда. Мана шу ислоҳотлар натижасида Янги Ўзбекистонда янги кино санъатига бўлган эътибор жуда юқори. Айнан ўзбек павильонининг Канн кинофестивалида очилиши ҳам бунга яққол мисол бўлади. Давлат раҳбарининг кино соҳасидаги ислоҳотлари самараси ўлароқ Янги Ўзбекистон даврида халқаро фестивалларда ўзбек павильонларининг иштирокини кузатяпмиз. Бундай нуфузли кинофестивалда ўзбек павильони очилиши бизни ғурурлантиради. Бу бизга кино санъатимизни ривожлантиришга, саноатимизни дунёга олиб чиқишга ёрдам беради", дея ўз фикрини билдирди Агентлик директори.

Фестивалнинг биринчи кунида Уммон давлатининг "Screan Films" кинокомпанияси ва қозоғистонлик кино вакиллари билан учрашув ўтказилиб, ўзбек фильмлари ва Тошкент кинофестивали билан таништирилди.

Канн кинофестивали 25 майгача давом этади.